মেন্‌-চু-খা ... ট্ৰেকিং-কেম্পিং-এড্‌ভেন্‌চাৰ

‘তুমি তোমাৰ সাহসৰ পৰীক্ষা প্ৰায়েই ল’বা, কিন্তু মৃত্যুৰ বাবে নহয়, জীয়াই থাকিবৰ বাবেহে৷’ ইটালীয়ান নাট্যকাৰ তথা কবি কাউণ্ট ভিট্টৰিয় আলফিয়েৰীৰ এই কথাষাৰ প্ৰায়ে মোৰ মনলৈ আহে৷ এনে বাক্যই এড্‌ভেন্‌চাৰ-তৃষ্ণাটোক দুগুণে উদ্বুদ্ধ কৰে!

জুলাই ২০১৬ৰ মাজভাগত নগা পাহাৰৰ খনমা আৰু ঝুক’ ভেলীৰ ছামাৰ হিল ট্ৰেকিং এক্সপিডিচন সুকলমে সমাপন কৰাৰ পাছত নৱেম্বৰ-ডিচেম্বৰত পুনৰবাৰ হেৰাই যোৱাৰ সুযোগ পালোঁ মোৰ অতিকৈ প্ৰিয় অৰুণাচলৰ পৰ্বতত৷ এটা বেক্‌-টু-বে্‌ক ট্ৰেকিং-কেম্পিং এড্‌ভেন্‌চাৰ৷ ডেষ্টিনেচন মেন্‌-চু-খা (চলতি নাম মেচুকা)৷

প্ৰস্তুতিৰ পৰা সমাপ্তি পৰ্যন্ত সমস্ত সামৰি পৰৱৰ্তী দিনত ‘অকব’ৰ দেৱালত ধাৰাবাহিকভাৱে খণ্ড খণ্ডকৈ উপস্থাপন কৰিবলৈ প্ৰয়াস কৰিছোঁ দুৰ্গম যাত্ৰাৰ অন্য এক কাহিনী৷ ভ্ৰমি ভাল পোৱা, ভ্ৰমণ-লেখা লেখি আৰু পঢ়ি ভাল পোৱাসকলৰ হাতত অৰ্পণ কৰিব খুজিছোঁ ‘মেন্‌-চু-খা ... ট্ৰেকিং-কেম্পিং-এড্‌ভেন্‌চাৰ’৷ লেখনিত কিবা ভুল-ভ্ৰান্তি দৃষ্টিগোচৰ হ’লে নিৰ্দ্বিধাই উনুকিয়াই দিবলৈ এইখিনিতে সদৌটিৰ প্ৰতি সনিৰ্বন্ধ অনুৰোধ ৰাখিলোঁ৷

সংলগ্নকৃত ফটোগ্ৰাফখন আমাৰ গাইড, প’ৰ্টাৰ, সহযোগী বন্ধু গেবু চোনাই তোলা৷ পাহাৰতলিত ডাৱৰৰ মাজে মাজে সেয়াই বহুপ্ৰত্যাশিত গন্তব্যথলী মেন্‌-চু-খা৷ পৰ্বতলানিয়ে চুই আছে চীন দেশ৷ সৰগীয় সৰু চহৰখন, ভাৰত-চীন ব’ৰ্ডাৰ প'ষ্ট বাদেই, আকাশী অৱস্থান, য’ৰ পৰা এই দৃশ্যটো ধৰি ৰখা হৈছে সেই পৰ্যন্ত লৈ যাম আপোনাক৷ বাটে বাটে কৈ যাম অনেক কথা, প্ৰচাৰৰ পৰা এতিয়াও যিবোৰ শতযোজন নিলগত, য’লৈ সৰহ মানুহ আজিও যোৱা নাই৷

আশা কৰোঁ লগে লগে থাকিব৷ ধন্যবাদ৷