সমৰ্থকে ফুটবলক কিমান চিৰিয়াছভাৱে লয়

১৯৯৪ৰ বিশ্বকাপৰ অন্তত ২জুলাই তাৰিখে এটা দুখজনক ঘটনা ঘটিল৷ 

Carlos Valderrama, Faustino Asprilla, Freddy Rincon, Oscar Cordoba, Adolfo Valenciaৰে পুষ্ট কলম্বিয়াক সেইবাৰ সকলোৱে ‘ডাৰ্ক হৰ্ছ’ আখ্যা দিছিল৷ সমৰ্থকসকলে আশা কৰিছিল যে নিজৰ দলটোৱে কিবা এটা কৰিব৷ এদিন আহিল কলম্বিয়া আৰু ইউ.এছ.এ.ৰ খেল৷ খেলৰ ৩৫ মিনিটত ইউ.এছ.এ.ৰ মিডফিল্ডাৰ John Harkesএ বলটো ক্রছ কৰি পঠিয়ালে কলম্বিয়াৰ বক্সলৈ৷ তাতে ৰৈ আছিল কলম্বিয়াৰ ২৭ বছৰীয়া ডিফেণ্ডাৰ Andres Escobar৷ তেওঁ বলটো আঁতৰাই পঠোৱাৰ চেষ্টা কৰিলে৷ পিছে সেই শ্বটটোত বলটো বিপদৰ পৰা আঁতৰি যোৱাৰ পৰিৱৰ্তে গ’লকীপাৰ Oscar Cordobaক পৰাভূত কৰি নিজৰ নেটতহে আশ্ৰয় ল’লেগৈ৷ হৈ গ’ল এটা আত্মঘাতী গ’ল৷ অৱশেষত খেলখনত কলম্বিয়া পৰাস্ত হ’ল ২-১ গ’লত৷

গ’ল কথা গুচিল৷ খেলা সামৰি স্বদেশলৈ উভতিল দলটো৷ সেই ঘটনাৰ ১০দিনৰ পিছত, নিজৰ বিয়াখনলৈ মাত্ৰ এমাহ বাকী থকা অৱস্থাত ঘটিল এক অভাৱনীয় দুঃখজনক ঘটনা৷ 

Andres Escobarক মেডিলিনৰ এখন বাৰত আততায়ীয়ে হত্যা কৰিলে৷ ১২টা গুলীৰে থকাসৰকা কৰা হ’ল খেলুৱৈজনৰ শৰীৰ৷ Escobarৰ কাৰণে হোৱা আত্মঘাতী গ’লটোৰ বাবেই কলম্বিয়া অপ্ৰত্যাশিতভাৱে প্ৰতিযোগিতাৰ পৰা বাহিৰ হোৱা বুলি সেই সময়ত গুজব ওলাইছিল৷ আৰু তাৰে এয়া আছিল প্ৰতিশোধ৷ শাস্তি হিচাপে প্ৰতিটো গুলী মাৰোঁতে হেনো Humberto Munoz Castro নামৰ হত্যাকাৰীজনে প্ৰতিবাৰতে ‘গ’ল’ বুলি চিঞৰিছিল৷ 

ফুটবলক একোজন সমৰ্থকে কিমান চিৰিয়াছভাৱে লয়, এয়া এটা উদাহৰণ৷

কলম্বিয়ান নাগৰিক ফুটবলৰ নামত সদায়েই উন্মত্ত৷ এবাৰ Christopher Jacome নামে ১৭বছৰীয়া ফুটবল-বলিয়া জনৈক কলম্বিয়ানক খেলি থকা অৱস্থাতে দুখ লগাকৈ হত্যা কৰা হৈছিল৷ অন্ত্যেষ্টিক্রিয়াৰ মুহূৰ্ত আহিল৷ পিছে বন্ধুসকলে Christopherৰ মৃতদেহটো শ্মশানলৈ নিয়াৰ পৰিৱৰ্তে লৈ গ’ল স্থানীয় এখন ষ্টেডিয়ামলৈহে৷ ষ্টেডিয়ামত সেইদিনা ফাইনেল খেল আছিল৷ Christopherৰ প্ৰিয় দল Cucuta Deportivoএ খেলখনত প্ৰতিদ্বন্দ্বিতা কৰিছিল৷ 

ফুটবল-প্ৰেমিকৰ স্মৃতিত সন্মান যঁচাৰ এই ৰীতি (!) সঁচাকৈয়ে আশ্চৰ্যকৰ৷