জীৱন আৰু ফুটবল...

মানুহৰ জীৱনৰ সৈতে ফুটবলৰ কিযে নিকট সামঞ্জস্য! গ’লপ’ষ্টক লক্ষ্য হিচাপে লৈ ফুটবলাৰে ফুটবল খেল এখন আগুৱাই নিয়ে, তালৈ শ্বট লয়৷ একেদৰেই মানুহে নিজৰ জীৱনৰ গ’লপ’ষ্ট আগতেই স্থিৰ কৰি নল’লে লক্ষ্যভ্ৰষ্ট হয়, জীৱনত সফলতাও নাহে৷ কোনোবা এজন আমেৰিকান চিন্তাবিদে তুলনামূলকভাৱে কোৱা এই কথাটো সঁচাকৈ খুব প্ৰেক্টিকেল আৰু প্ৰত্যেকৰে ক্ষেত্ৰতে প্ৰযোজ্য৷

সেয়েহে চাগৈ বিশ্ব-জনগণৰ অন্তৰে অন্তৰে সোমাই আছে ফুটবল৷

জীৱনৰ খেলখন ফুটবলৰ লগত মিলে৷ সমস্যাবোৰ tackle কৰিব লগা হয়, সংশয়বোৰ block কৰিব লগা হয়, সুবিধা পালেই score কৰিব লাগে... ফুটবলত যিদৰে, জীৱনতো সেইদৰেই৷

ফুটবলত দৰকাৰী শিক্ষা নিহিত হৈ আছে৷ বিদ্যালয়ত ফুটবলৰ প্ৰয়োজনীয়তা সম্পৰ্কত পূৰ্বৰ এজন আমেৰিকান খেলুৱৈ তথা প্ৰশিক্ষক Vincent Thomas Lombardiয়ে কৈ গৈছে... A school without football is in danger of deteriorating into a medieval study hall.

পাইছিলোঁ... Knowledge is power বুলি৷ কোনোবাই ক’লে... নহয়, আচল কথাটো হ’ল... Applied knowledge is power৷ একেদৰে জানিছিলোঁ... Practice makes a man perfect বুলি৷ আমেৰিকান ফুটবলাৰ, প্ৰশিক্ষক আৰু কাৰ্যবাহী Vincent Thomas Lombardiএ পিছে ক’লে... Practice does not make perfect. Only perfect practice makes perfect৷ কথাটো ঠিকেই৷ ফুটবলতো সঁচা, জীৱনতো সঁচা৷

এজন স্বাস্থ্যহীন ডেকাক উদ্দেশ্য কৰি স্বামী বিবেকানন্দই এবাৰ কৈছিল... You will be nearer to heaven playing football than studying the Bhagavad-Gita. পৱিত্ৰ গীতা অধ্যয়নৰ জৰিয়তে আধ্যাত্মিকতা আহৰণৰ অৰ্থে সেই ডেকাজন চিকাগো-ফেৰৎ বিবেকানন্দৰ ওচৰলৈ পৰামৰ্শ বিচাৰি আহিছিল৷ চেৰেলা ল’ৰাজনক কৰা উক্ত মন্তব্যৰ আঁৰত লুকাই থকা স্বামীজীৰ ইংগিতটো আছিল... প্ৰথমে স্বাস্থ্য ঠিক কৰা, শৰীৰক শক্তিশালী কৰা৷

ঠিকেইতো৷ এটা স্বাস্থ্যৱান শৰীৰৰ ভিতৰতহে এটা স্বাস্থ্যৱান মনে থিতাপি ল’ব পাৰে৷ আৰু মনটো যদি সবল নহয়, সঁচা অৰ্থত আধ্যাত্মিকতা আহৰণ কৰাটোও অসম্ভৱ৷ বিবেকানন্দৰ উক্ত মন্তব্যৰ গূঢ়াৰ্থ মন কৰিবলগীয়া নিশ্চয়৷

গতিকে পোনতে স্বাস্থ্য, জীৱন৷ আৰু তাতেই আছে ফুটবলৰ মহত্ত্ব!