ভগৱান আৰু চয়তানৰ আলাপ...

আজি পুৱা

এতিয়া সৰ্বত্ৰ কেৱল একেটাই আলোচনা৷ 

বিশ্বকাপ, বিশ্বকাপ আৰু বিশ্বকাপ৷ 

আজি ৰাতিপুৱা৷

ভগৱান আৰু চয়তানেও চাহৰ কাপ মুখৰ আগত লৈ বিশ্বকাপ ২০১৪ৰ কথাকে পাগুলি আছিল৷ ব্ৰাজিল নে জাৰ্মানী? ইটালী নে আৰ্জেণ্টিনা? স্পেইন নে ইংলেণ্ড? ফ্ৰান্স নে উৰুগুৱে? কোন কিমান শক্তিশালী? মুঠতে সৰৱ আলোচনা৷ সাতে সোতৰই মিলি ব্ৰাজিলেই এইবাৰ নিব বুলি উভয়ে একমত প্ৰকাশ কৰিলে৷

ইমানলৈকে সব ঠিকেই আছিল৷ পিছে তাৰ পিছতহে আহি পৰিল আচল প্ৰসংগ৷ দুয়োৰে নিজৰ নিজৰ টীমৰ কথা ওলাল৷ কাৰ দল শক্তিশালী, ভগৱানৰ নে চয়তানৰ? এইবাৰ কিন্তু কোনেও কাৰো বশ্যতা স্বীকাৰ মুঠেও নকৰিলে৷ ফলত লাহে লাহে বিষয়টোৱে বিতৰ্কৰ পৰ্যায় পালেগৈ৷ অযথা কথা কটাকটি কৰি পৰিস্থিতি অধিক বেয়াৰ পিনলৈ ঢাল খাওঁ খাওঁ হওঁতেই চয়তানে প্ৰেক্টিকেল কথা এটা কৈ দিলে, ‘তৰ্কাতৰ্কি এৰি আবেলিলৈ মেচ এখনকে খেলি চোৱা যাওক নহ’লে৷’

ইফালে ফলাফল সংক্রান্তত ভগৱান আগৰে পৰাই নিশ্চিত৷ তেওঁৰ দলেই জিকিব৷ গতিকে চয়তানৰ ফালে চাই পোনেই ভেকাহি এটা মাৰি পঠিয়ালে, ‘কি খেলি চোৱাৰ কথা কৈছাহে? তুমি নাজানা নেকি যে সকলো ভাল ফুটবলাৰ মৰিলে স্বৰ্গলৈয়ে যায়৷ গতিকে তেওঁলোকে মোৰ ফালেই খেলিব৷ তেনেস্থলত তোমাৰ অৱস্থা কি হ’ব, কিমান গ’ল খাবা, ভাবি চাইছানে এবাৰ?’

ভগৱানৰ যুক্তি শুনি চিন্তিত হোৱাৰ সলনি চয়তানে এক অৰ্থপূৰ্ণ হাঁহি মাৰিলে৷ তাকে দেখি ভগৱান আচৰিত হ’ল৷ মনে মনে ভাবিলে, কথাটো কি? এওঁ দেখোন হাঁহিলে!

অলপ পিছতে চয়তানে গহীনাই উত্তৰ দিলে, ‘তুমি নাজানা নেকি, সকলো ৰেফাৰী মোৰ ফালে আছে বুলি?’