বিশ্বকাপৰ ইতিহাসত দ্ৰুততম গ’ল

দিনটো আছিল ২৯জুন ২০০২৷ কোৰিয়া-জাপান বিশ্বকাপৰ তৃতীয় স্থান নিৰ্ণয়কাৰী গুৰুত্বপূৰ্ণ খেলা৷ স্থান Daegu World Cup Stadium৷ প্ৰতিদ্বন্দ্বিতা তুৰ্কী আৰু ঘৰুৱা দল কোৰিয়া ৰিপাব্লিকৰ মাজত৷ কিক্‌ অফ্‌ হ’ল৷ আৰু সিদিনা খেলখন পৰিচালনা কৰা কুৱেইটৰ ৰেফাৰী Saad Maneৰ হাতঘড়ীটোৰ চেকেণ্ডৰ কাঁটাডাল ১, ১কৈ আগুৱাই ১১ৰ পাওঁতেই হ’ল এটা গ’ল! তুৰ্কীৰ ফ’ৰৱাৰ্ড তথা দলপতি Hakan Sukurএ কোৰিয়াৰ নেট কঁপাই দিলে৷ অবিশ্বাস্য! খেল আৰম্ভ হোৱাৰ ১১চেকেণ্ডতে গ’ল৷ বিশ্বকাপৰ ইতিহাসত সেইটোৱেই হৈছে দ্ৰুততম গ’ল৷

উক্ত বিশ্বকাপত তুৰ্কীয়ে অবিশ্বাস্য পাৰদৰ্শিতা দেখুৱালে৷ নিজৰ গ্ৰুপ-চিৰ মেচত ব্ৰাজিলৰ সৈতে ২-১গ’লত হাৰিলেও কষ্টাৰিকাৰ সৈতে ১-১ ড্ৰ আৰু তাৰ পিছত চীনক ৩-০ত পৰাভূত কৰি সেইবাৰ তুৰ্কীৰ ৰাউণ্ড অব চিক্সটিনত প্ৰৱেশ৷ দ্বিতীয় ৰাউণ্ডত আয়োজক দেশ জাপানক ১-০, কোৱাৰ্টাৰ ফাইনেলত চেনেগালকো ১-০ত হৰুৱাই ছেমিত পুনৰ ব্ৰাজিলৰ মুখামুখি৷ ০-১ত পৰাজয় বৰণ৷ তাৰ পিছতে কিন্তু অন্যতম আয়োজক দেশ, ঘৰুৱা দল দক্ষিণ কোৰিয়াক ৩-২ত হৰুৱাই টুৰ্ণামেণ্টত তৃতীয় স্থান কাঢ়ি ল’লে দলটোৱে৷

বিশ্বকাপৰ দ্ৰুততম গ’লটোও দিলে তেওঁলোকৰে কেপ্টেইন Hakan Sukurএ৷ তেওঁলোকৰ তিনিজনকৈ খেলুৱৈ ক্রমে গ’লৰক্ষক Rustu Recber, ডিফেণ্ডাৰ Alpay Ozalan আৰু ফ’ৰৱাৰ্ড Hasan Sasএ স্থান পালে All-star teamত৷ সঁচাই আগ্ৰাসী প্ৰদৰ্শন৷