আকৌ ফুটবল এখন চালোঁ…

বাৰ্চিলোনা ৩, জুভেণ্টাছ ১

ঐতিহাসিক জয়েৰে এটা চিজনত তিনিটা খিতাপ দুবাৰকৈ জয় কৰা ইতিহাসৰ প্ৰথমটো ফুটবল দল হিচাপে পৰিগণিত হ’ল আমাৰ প্ৰিয় এফ.চি. বাৰ্চিলোনা৷ ৬জুন শনিবাৰ (আমাৰ সময়মতে দেওবাৰ, ৭জুন)ৰ বহু প্ৰত্যাশিত এই খেলখনৰ বাবে আমি পিতা-পুত্ৰ হালেই ৰৈ আছিলোঁ বহুদিনৰ আগৰে পৰাই৷ মনত অনেক জল্পনা-কল্পনা ৷

উল্লেখ্য যে ছেমি ফাইনেলত বাৰ্চিলোনাই বেয়াৰ্ন মিউনিখক আৰু জুভেণ্টাছে ৰিয়েল মাদ্ৰিদক পৰাস্ত কৰিছিল৷

অৱশেষত সকলো জল্পনা-কল্পনাৰ ওৰ পেলাই ফুটবল পথাৰৰ যোগ্য দল হিচাপেই বাৰ্চিলোনাই আজুৰি আনিলে উয়েফা চেম্পিয়নছ লীগৰ চেম্পিয়নশ্বিপ সন্মান ৷ প্ৰদৰ্শনৰ পুনৰাবৃত্তি ঘটাই লিপিবদ্ধ কৰিলে তিনিটাকৈ খিতাপ জয় কৰা ইউৰোপিয়ান দলৰ তালিকাত নিজৰ নাম৷ এই ইতিহাস ৰচনাত হাত ধৰিলে গ’লদাতা ইভান ৰাকিটিক, লুই ছুৱাৰেজ, নেইমাৰ জুনিয়’ৰ প্ৰমুখ্যে দলৰ খেলুৱৈসকলে৷ চলিত চিজনত দুৰ্দান্ত ফৰ্মত থকা তিনি ছুপাৰষ্টাৰ ক্ৰমে লায়’নেল মেছি, ছুৱাৰেজ আৰু নেইমাৰৰ দৃষ্টিনন্দন ফুটবলে নিশাৰ প্ৰতিটো মুহূৰ্ততে সজীৱ কৰি ৰাখিলে আমাক৷ বল আৰু নে’টৰ স্পৰ্শ স্থাপনত ছুৱাৰেজ আৰু নেইমাৰৰ চমৎকাৰিত্বৰ উপৰি আন্দ্ৰেছ ইনিয়েষ্টা, জাভি হাৰ্ণাণ্ডেজৰ ফুটবল বৈচিত্ৰ্যই অভিভূত কৰিলে প্ৰতিটো পল-অনুপল৷ বিপৰীতে জুভেণ্টাছৰ গিয়ানলুইগি বাফন, আন্দ্ৰেয়া পিৰ্লো, কাৰ্লোছ টেভেজ, ক্লডিঅ’ মাৰ্চিছিঅ’, উদীয়মান তাৰকা প’ল পগবাৰ ক্ৰীড়ানৈপুণ্যয়ো মধ্যনিশা চকু টানি অনা টোপনিৰ শক্তিক ক’ৰবালৈ খেদি পঠিয়ালে৷

এফালে স্পেনিছ আৰু আনফালে ইটালীৰ আগশাৰীৰ দল দুটিৰ তাৰকাসমৃদ্ধ ফুটবলাৰৰ শেহতীয়া কাৰুকাৰ্য চাই দুনয়ন ভৰি উঠিল৷ফেভাৰিট দল হিচাপেই বাৰ্লিনত শেষ হাঁহিটো মাৰিলে এফ.চি. বাৰ্চিলোনাই৷ চেম্পিয়নছ লীগৰ বিজয়েৰে ট্ৰফী উপহাৰ দিয়াৰ স্বপ্ন সাকাৰ কৰি দলৰ মিডফিল্ডাৰ জাভিয়ে সামৰিলে বাৰ্চিলোনাত নিজৰ বৰ্ণাঢ্য ফুটবল কেৰিয়াৰ৷ আৰম্ভণিৰে পৰা শেষ মিনিট পৰ্যন্ত প্ৰতিটো মুহূৰ্ততে উত্তেজনাই বিৰাজ কৰি থকা খেলখনত পোনতে আধিপত্য বিস্তাৰ কৰে বাৰ্চিলোনাই৷ স্ক’ৰিং ট্ৰায়’ মেছি, নেইমাৰ, ছুৱাৰেজক বিপক্ষৰ ৰক্ষণ বিভাগে চোকা পহৰাত ৰখাৰ সুযোগ লৈ বাৰ্চিলোনাৰ গলসন্ধানী মিডফিল্ডাৰ ৰাকিটিকে প্ৰথমটো গ’লেৰে নিজ দলক আগুৱাই নিয়ে৷ প্ৰথমাৰ্ধৰ ৪মিনিট গৈছেহে তেতিয়া৷ তাৰ পিছতো বাৰ্চিলোনাৰ উপৰ্যুপৰি আক্ৰমণত থকা-সৰকা হৈ পৰিছিল জুভেণ্টাছৰ দুৰ্গ৷ লাহে লাহে থিতাপি লৈ ৫৫মিনিটত অলভাৰো মৰাটাই দলৰ হৈ গ’ল কৰি সমতা স্থাপন কৰিবলৈ সক্ষম হয়৷

দ্বিতীয়াৰ্ধৰ আৰম্ভণি হুইচেলটোৰ পৰাই জুভেণ্টাছে হেঁচা প্ৰয়োগ কৰিব ধৰিলে৷ ক্ষীপ্ৰতৰ কাউণ্টাৰ এটেকেৰে বাৰ্চিলোনায়ো তামাকাঁহা দেখুৱাই গ’ল প্ৰতিপক্ষক৷ ৬৮মিনিটত ছুৱাৰেজে গ’ল দি দলক আগুৱাই নিলে (২-১)৷

তাৰ পিছতে নেইমাৰে হে’ড কৰি গ’ল এটা দিছিল যদিও বলটোৱে তেওঁৰ সোঁহাতখন চুই যোৱাত ৰেফাৰীয়ে নাকচ কৰে৷ খেলৰ অন্তিম মিনিটত একেজন গ’লপিপাসুৱে দৰ্শনীয় ফিনিশ্বিঙেৰে ফলাফল ৩-১ কৰিবলৈ সক্ষম হয়৷ বাৰ্লিনৰ অলিম্পয়াষ্টেডিয়ন তেতিয়া সমৰ্থকৰ আনন্দোৎসৱত ফাটি পৰিছিল৷ লগে লগে পৰিসমাপ্তি ঘটিছিল উয়েফা চেম্পিয়নছ লীগ ২০১৫ৰ চূড়ান্ত খেলখনৰো৷

প্ৰিয় খেলুৱৈ নেইমাৰৰ অন্তিম মুহূৰ্তৰ সেই দৰ্শনীয় গ’লটোৰে বাৰ্চিলোনাই চিজনটোৰ বাবে অভিযান সামৰাৰ পিছত আনন্দ-উল্লাসৰ মাজেৰে আমি পিতা-পুত্ৰ হালে যেতিয়া চিনাকি বিছনাখনত নিশাটোৰ অৱশিষ্ট সময়কণৰ বাবে থিত্‌ লৈছিলোঁগৈ, ডিজিটেল ৱালক্লকটোত তেতিয়া ঠিক ২.৩০বাজিছিল৷ চকু বন্ধ কৰাৰ পিছতো কিছু সময়ৰ বাবে ভাহি আছিল ফুটবল যাদু৷ এই যাদুৰ অদ্ভুত মন্ত্ৰশক্তিয়ে পৃথিৱীৰ ফুটবলপ্ৰেমীক নিতে মোহাচ্ছন্ন কৰি আহিছে৷ আমিও তাৰ মাজতে আছোঁ৷