শদিয়ালৈ গ’লোঁ, দীঘল দলং চালোঁ (৫)

বাছখনৰ চিট্‌ এটা অধিকাৰ কৰি লোৱাৰ পৰতে ধলা গাঁও তিনিআলিৰ দিশে এবাৰ দৃষ্টি নিগৰালোঁ৷ আগৰজন মুখ্য মন্ত্ৰী তৰুণ গগৈক ধলা-শদিয়া দলঙত উঠিবলৈ নিদিয়াক কেন্দ্ৰ কৰি সৌ-সিদিনা হঠাতে উত্তাল হৈ পৰিছিল এই অঞ্চলটো৷ গগৈৰ মন্ত্ৰিত্বৰ কালতে দলংখনৰ অধিকাংশ নিৰ্মাণ কাৰ্য সম্পন্ন হৈছিল৷ পূৰ্বৰ প্ৰধান মন্ত্ৰী ডক্টৰ মনমোহন সিঙৰ দিনত দলংখন নিৰ্মাণৰ পুঁজি আবণ্টন দিয়া হৈছিল৷ নৱযুগ ইঞ্জিনিয়াৰিং কোম্পানী লিমিটেডক নিৰ্মাণৰ দায়িত্বও তেতিয়াই অৰ্পণ কৰা হৈছিল৷ যোৱা ২২ মে’ তাৰিখে দলং চাবলৈ গৈ দলঙত উঠিবলৈ লওঁতে প্ৰাক্তন মুখ্য মন্ত্ৰীজন প্ৰশাসনৰ বাধাৰ সন্মুখীন হ’বলগীয়া হ’ল৷ বিশেষ প্ৰতিৰক্ষা গোট (এছ.পি.জি.)ৰ হাতত দলংখন চমজাই দিয়া বুলি কোৱা হ’ল৷ তাৰ পিছদিনাখনেই অৰ্থাৎ ২৩ মে’ তাৰিখে তিনিচুকীয়া, মাৰ্ঘেৰিটা আৰু ডিগবৈৰ বিজেপি বিধায়ক ক্রমে সঞ্জয় কিষাণ, ভাস্কৰ শৰ্মা আৰু সুৰেন ফুকনে দলঙৰ ওপৰত ডিঙিত ধৰাধৰিকৈ তোলা আলোক-চিত্ৰ ছ’চিয়েল মিডিয়াত হৈ পৰিল ভাইৰেল৷ আগৰ মুখ্য মন্ত্ৰীজনক বাধা প্ৰদান কৰা কাৰ্যত ৰাজনৈতিক চক্রান্ত নিহিত থকা বুলি জাঙুৰ খাই উঠিল একাংশ দলীয় সমৰ্থক-কৰ্মী৷ এছ.পি.জি.ৰ তত্ত্বাৱধানলৈ যোৱাৰ পাছত দলঙত পৰুৱা এটাও সোমাব নোৱাৰে বুলি কোৱা হৈছিল৷ তেনেস্থলত বিজেপি নেতাই কেনেকৈ ছেল্‌ফী তুলিবলৈ পালে বুলি প্ৰচণ্ড বিতৰ্কৰ সূত্ৰপাত ঘটিল৷ প্ৰতিবাদত উত্তাল হ’ল ধলা গাঁও তিনিআলিৰ পৰিৱেশ৷ খড়্‌গহস্ত হৈ পৰিল যুৱ-কংগ্ৰেছী৷ উন্মোচনৰ দিনদিয়েক আগতে ঘটা তেনে অশুভ ঘটনাই আমাকো চিন্তিত কৰিছিল যদিও উদ্দেশ্যৰ পৰা অকণোৱেই বিচলিত নহ’লোঁ৷ ফলক্রমে সোঁশৰীৰে আজি এইখিনি আহি পাই গ’লোঁ৷

২০০৭ চনৰ ১৪ ছেপ্টেম্বৰত তদানীন্তন ইউ.পি.এ. নেতৃত্বাধীন কেন্দ্ৰীয় চৰকাৰে দলংখন নিৰ্মাণৰ বাবে ৫০৫.৪০ কোটি টকা ধাৰ্য কৰিছিল৷ ধন ব্যয়ৰ দায়িত্ব দিয়া হৈছিল উত্তৰ-পূব পৰিষদক৷ তিনি বছৰৰ পাছত অৰ্থাৎ ২০১০ চনৰ নৱেম্বৰ মাহত নিৰ্মাণ কাৰ্যৰ শুভাৰম্ভ কৰা হয়৷ ২০১০ চনৰ পৰা আজি ২০১৭ চন৷ নিৰ্মীয়মান দলঙৰ ছবি চাই চাই দৈনন্দিন তাৰ কাষৰীয়া জলপথেৰে ইপাৰ-সিপাৰ হোৱা ধলা-শদিয়াবাসীৰ বাবে পাৰ হৈ যোৱা সেই সময়চক্ৰৰ প্ৰতিটো মুহূৰ্তই আছিল প্ৰত্যাশাৰ মুহূৰ্ত, লগতে চৰম ধৈৰ্য পৰীক্ষাৰ ক্ষণ৷ তাত কাৰো অকণো সন্দেহ নাথাকিব৷ আনহাতে, অটল বিহাৰী বাজপেয়ী ২০০৪ চনত ক্ষমতালৈ অহা হ’লে ১০ বছৰৰ আগতেই দলংখন হৈ উঠিলহেঁতেন বুলি প্ৰধান মন্ত্ৰীয়ে ভাষণত কালি সজোৰে কৈ গৈছে৷ নাজানো কাৰ্যতঃ কি দেখা গ’লহেঁতেন৷ অৱশ্যে এইটো ঠিক যে এইখন দলঙক লৈ নিজৰ অন্য কেতবোৰ প্ৰাপ্যৰ দৰে অসমবাসীয়ে আন্দোলন কৰিবলগীয়া হোৱা নাই৷

সেতুখনৰ নিৰ্মাণ কাৰ্যৰ উক্‌মুকনি হৈছিল বাজপেয়ী চৰকাৰৰ দিনত৷ ৮০ শতাংশ কাম সমাধা হৈছিল ডক্টৰ মনমোহন সিং নেতৃত্বাধীন কংগ্ৰেছ চৰকাৰৰ আমোলত৷ নৰেন্দ্ৰ মোদী নেতৃত্বাধীন বৰ্তমান শাসনাধিষ্ঠিত বিজেপিৰ সময়ত কাম সম্পূৰ্ণ হ’ল৷ তাৰে সুবাদত দলংখন আড়ম্বৰপূৰ্ণভাৱে শুভ-উদ্বোধন কৰি ৰাষ্ট্ৰৰ প্ৰতি উৎসৰ্গাৰে বৰ্তমানৰ চৰকাৰখনে কৃতিত্বৰ ষোল অনাই নিজৰ কৰি বেচ ৰাজনৈতিক মুনাফা লুটিলে বুলি বিভিন্ন মহলত বু-বু-বা-বা শুনা গৈছে৷ কিন্তু পক্ষপাতিত্বৰ পৰা আঁতৰি গভীৰভাৱে পৰ্যালোচনা কৰিলে দেখা যায় যে দেশৰ উক্ত তিনিওগৰাকী প্ৰধান মন্ত্ৰীৰে গুৰুত্বপূৰ্ণ অৱদান ইয়াৰ সৈতে বিজড়িত হৈ আছে৷ স্বপ্নদ্ৰষ্টা দূৰদৰ্শী ৰাজনেতাসৱৰ লগতে এই সুবৃহৎ প্ৰকল্পটোৰ কল্পনা আৰু বাস্তৱ; আঁচনি, পুঁজি, ৰূপায়ণ ইত্যাদি কাৰ্য প্ৰণালীৰ সৈতে জড়িত প্ৰতিজন ৰাজনৈতিক-অৰাজনৈতিক ব্যক্তিয়েই ইয়াৰ বাবে নিশ্চয়কৈ ধন্যবাদাৰ্হ৷ ব্ৰহ্মপুত্ৰৰ পূবৰ উপনৈ লোহিতৰ ওপৰত দেশৰ ভিতৰতে দীঘলীয়াকৈ দলং সজাৰ এই প্ৰকল্পটো আন্তঃগাঁথনি উন্নয়নাৰ্থে ভাৰতবৰ্ষই হাতত লোৱা দৰকাৰী আৰু সময়োপযোগী নিৰ্মাণকাৰ্য বুলি ইতিমধ্যেই বিবেচিত হৈছে৷