আটাইতকৈ ভাল খবৰেৰেই আৰম্ভ হ’ল নতুন বছৰটো

(গল্প নহয়, সত্য)

পল-অনুপলকৈ সময়বোৰ বাগৰি নতুন বছৰৰ প্ৰথম দিনটো মানে দুই হাজাৰ পোন্ধৰৰ এক জানুৱাৰীটো ঠিক সোমাইছিলহে, ভাল খবৰ এটা আহিলেই৷ ভাল খবৰ বুলি এখন তালিকা তৈয়াৰ কৰিলে যিমানবোৰ খবৰ তাত অন্তৰ্ভুক্ত হ'ব, সকলোৰে ভিতৰত এক নম্বৰ অৰ্থাৎ আটাইতকৈ ভাল খবৰটো হ’ব মানুহৰ পৰা মানুহৰ উৎপাদন হোৱাৰ, মানে সন্তান জন্মৰ খবৰ৷ সেইটো খবৰেই আহিল মোলৈ!

হেপী নিউ ইয়েৰ, হেপী নিউ ইয়েৰ বুলি আশাত উত্তাল হৈ থকা চৌপাশৰ আনন্দমুখৰ পৰিৱেশতে, ওচৰৰ গীৰ্জাত মধ্যৰাতিৰ প্ৰাৰ্থনা চলি থকাৰ পৰতে, ভাল খবৰটো ঘপকৈ কাণত পৰিলহি৷ শুনি নিজেও হেপী হৈ গ’লোঁ৷ একে আষাৰে নৱজাতকৰো নাম এটা দি দিলোঁ... ‘হেপী’৷ প্ৰাৰ্থনা কৰিলোঁ... সি সদায়েই হেপী হৈ থাওক৷

একে সময়তে অন্য কথা এটাত আচৰিতো নহৈ নোৱাৰিলোঁ... এনেকৈ কেনেকৈ ইমান কেলকুলেচন মিলি যায়! নিজৰ ল’ৰা-ছোৱালীহালৰ জন্মদিন কেতিয়া কেতিয়া বুলি সুধিলে আজিও সিহঁতৰ বাৰ্থ চাৰ্টিফিকেট দুখন লুটিয়াব লগাত পৰোঁ৷ তাৰিখ মনত নাথাকে৷ ইফালে নিজৰটোও মহা গণ্ডগোলীয়া টাইপৰ হ'ল৷ দুবাৰকৈ জনম ধৰি থৈছোঁ! মাতৃদেৱীয়ে কোৱা হিচাপটো এটা, স্কুল চাৰ্টিফিকেটৰ গণনাই দেখুৱাটো এটা৷ এনে গোলমলীয়া কাৰবাৰতকৈ একত্ৰিশ ডিচেম্বৰ কিম্বা এক জানুৱাৰী, এইবোৰেই বে'ষ্ট৷ মনত ৰাখিবলৈকো সহজ৷ বয়সৰ অংক কৰিবলৈকো সহজ৷ দিন-মাহ-বছৰ ধাৰ কৰি থকাৰ জঞ্জাল নাই৷

ঈশ্বৰে কিছুমানক আমাৰ মাজলৈ হিচাপ মিলায়েই পঠিয়ায়৷ যেনেকৈ এই নৱজাতকক৷ আৰু নতুন বছৰ এটাৰ উকমুকনিতে সিহঁতেও লৈ আহে একোটা উৎকৃষ্ট খবৰ, আমাৰ দৰে বেহিচাপীবোৰৰ বাবে৷