শনিবৰীয়া ‘মোৰ আলহী’ত আজি আগ বঢ়াইছোঁ এটি কবিতা৷ কবি মোলান ইংতি৷ শোণিতপুৰ জিলাৰ বিহালী মৌজাৰ বিহমাৰী লাংপ্ৰাট ইংতি গাঁৱত জন্ম গ্ৰহণ কৰা কবিগৰাকীয়ে ডিফুত শেষ নিশ্বাস ত্যাগ কৰে৷ ২০১০চনত প্ৰকাশিত তেখেতৰ একমাত্ৰ সংকলন ‘প্ৰেমৰ সেউজ শইচ ইত্যাদি’ৰ পৃষ্ঠাৰ পৰা একে নামৰ কবিতাটি আজি ‘অকব’ৰ ৱালত উদ্ধৃত কৰিলোঁ৷

‘প্ৰেমৰ সেউজ শইচ ইত্যাদি’

মন-পথাৰত খু-দুৱনি বান

প্ৰেমৰ সেউজ শইচ ছটিয়াওঁ কেনেকৈ?

সুৱাগমণি পথাৰত চৰহা পোকে আগুৰিলে

আইৰ কোলাত বাৰিষাৰ কঠিন দুখ৷

সখিয়তী চৰাইৰ পাখিত

তেজে তুম্‌ৰলি কৰা ৰং

ধানপুৰীয়া কঁঠালজোপাত বহি

তাই এতিয়া

নেমাতে চিনাকি সুৰীয়া মাত

আইৰ কোলাত বাৰিষাৰ কঠিন দুখ৷

আঃ

সপোন চাকনৈয়া বালিচৰ৷