আজি বিশ্ব পৰ্যটন দিৱস

বিশ্ব পৰ্যটন দিৱসৰ মূল উদ্দেশ্য হৈছে আন্তৰ্জাতিক সম্প্ৰদায়ৰ মাজত সু-সময়ৰ জৰিয়তে পৰ্যটনৰ গুৰুত্ব আৰু ভূমিকাৰ বিষয়ে সজাগতা বৃদ্ধি কৰা৷ সামাজিক, সাংস্কৃতিক, ৰাজনৈতিক আৰু অৰ্থনৈতিক দিশত পৰ্যটনে আনিব পৰা অপৰিসীম পৰিৱৰ্তন আৰু প্ৰভাৱেই এই দিৱসৰ মূল তাৎপৰ্য৷ ১৯৭০চনৰ এই দিনটোতে বিশ্ব পৰ্যটন সংস্থাই পৰ্যটন পৰিনিয়ম গ্ৰহণ কৰিছিল৷ ১৯৮০চনৰ পৰা ৰাষ্ট্ৰসংঘই প্ৰতি বছৰে ২৭চেপ্তেম্বৰ দিনটো বিশ্ব পৰ্যটন দিৱস হিচাপে পালন কৰি আহিছে৷ ১৯৯৭চনৰ পৰা প্ৰতি বছৰে একোটা নতুন বিষয়-বস্তু (থিম) লৈ বিশ্ব পৰ্যটন দিৱস উদ্‌যাপন কৰি অহা হৈছে৷ বিশ্বৰ অৰ্থনৈতিক পৰিৱৰ্তনৰ প্ৰতি লক্ষ্য ৰাখি এই থিম যুগুত কৰা হয়৷ বিশ্ব পৰ্যটন দিৱসৰ এইবাৰৰ থিম হৈছে পৰ্যটন আৰু পানী : আমাৰ নিৰাপদ ভৱিষ্যৎ৷

...এইখিনি কিতাপৰ কথা৷

ব্যক্তিগতভাৱে, এটা কথা আজি ভাবি ভাল লাগে যে ২০১০চনৰ বিশ্ব পৰ্যটন দিৱসৰ দিনটোতে জীৱনৰ প্ৰথম বিদেশ যাত্ৰা কৰিছিলোঁ৷সেই সুখ-স্মৃতি সুঁৱৰিবৰ আজি দুনাই সুযোগ পাইছোঁ৷ কিতাপ অধ্যয়ন কৰি বা ফটোগ্ৰাফ, ভিডিঅ আদি চাই আমি যি পৰোক্ষ জ্ঞান লাভ কৰোঁ ভ্ৰমণে তালৈ পূৰ্ণতা আনে৷ সেই প্ৰত্যক্ষ জ্ঞানকণৰ বাবেই সুযোগ পালেই ভ্ৰমণ কৰাৰ দুৰ্বাৰ আগ্ৰহ জন্মে৷ সেই অনন্ত জিজ্ঞাসাক লৈয়ে বাট চাই ৰওঁ, পৰৱৰ্তী ভ্ৰমণলৈ৷ সঁচাকৈ, পুথিলব্ধ জ্ঞানৰ পৰিপূৰ্ণতা অনাত আৰু বাস্তৱ অভিজ্ঞতাৰ জৰিয়তে বিশালাকাৰ এই জগতখনৰ  সৈতে পৰিচয় হোৱাত ভ্ৰমণৰ গুৰুত্ব আৰু ভূমিকা অনন্য-সাধাৰণ৷

...ভ্ৰমণ কৰি ভাল পোৱাসকলক দিৱস উপলক্ষে সম্ভাষণ জনাইছোঁ৷