১.৮ চিট বুকিং নহ’ল

আলোচনা সমাপ্ত হোৱাৰ পাছতে পি.চি.টো খুলিলোঁ আৰু মিলাই চালোঁ ৷ হয়, প’ষ্টাৰত উল্লেখ থকা প্ৰথম ফোন নম্বৰটোৱেই মোৰ সৈতে ক্ষন্তেক আগতে কথা পতা, নেদেখা ব্যক্তিজনৰ ৷ মানে চ’ক’ তায়ুৰ ৷ এতিয়া তেৱেঁই মোৰ কল্পনাৰ লিংকমেন ৷ 

অনৰ্গল জপ কৰি আছোঁ এটাই নাম ৷ চ’ক’ তায়ু, চ’ক’ তায়ু ৷ কোনো কাৰণতে পিছ এৰাত নাই এইজনৰ ৷
২৬ জানুৱাৰী, গণতন্ত্ৰ দিৱসৰ সন্ধিয়া ৷ ফোন কৰিলোঁ… তায়ুজী, মে’ৰা চিট কনফাৰ্ম হ’ গয়া ক্যা ?

উত্তৰটোহে মনে বিচৰা বিধৰ মুঠেই নহ’ল ৷ ক’লে… ছৰী ছাজিদজী ৷
সিমানতে বুজি গ’লোঁ যে কাম নহ’ল ৷
কাৰণটো জনালে... মতলব আজ মে’ ইতনা বিজি থা না, ক্যা ব’লেগা ! কাউণ্টাৰ যানেকা সময়হি নেহী মিলা ৷ কল জৰুৰ কৰ দে’গা ৷

ইয়াৰ পাছত কেইছেকেণ্ডমানৰ নিৰৱতা ৷ মই অকণমান বিবুদ্ধিতে পৰিলোঁ ৷ তথাপি মনৰ গতিবেগ সম্বৰণ কৰি মুখনি মাৰিবলৈ বাধ্য… হ’গা হ’গা, কল কিজিয়ে ৷
যিয়েই নহওক, এতিয়া এই মানুহজনেই মোৰ ভৰসা ৷

উৎসাহেৰে তেওঁ যোগ দিলে… ভিডিঅ’ এটাৰ পাছত লাগি থাকোঁতেই আজি দিনটো গুচি গ’ল ৷ ফেষ্টিভেল গ্ৰাউণ্ডত পৰম্পৰাগত ইদু মিচিমি চাংঘৰ এটা নিৰ্মাণ কৰা হৈছে ৷ আপুনি গৈ পালে দেখিবই ৷ ম’বাইল ফোনত ৰেকৰ্ডিং কৰি অনা ক্লিপিংছবোৰ লগ লগাই মই এটা ভিডিঅ’ প্ৰস্তুত কৰিলোঁ ৷ বহুত সময় লাগিল কিন্তু ৷ মোৰ কম্পিউটাৰো ঠিক নহয় ৷ তথাপি... ৷ আপল’ড কৰিম ৷ আপুনি চাব দেই ৷ অ’, আজি এটা ফে’চবুক প’ষ্ট দিছিলোঁ ৷ ডিবাং ভেলীৰ ল’কেল বেম্ব’ প্ৰডাক্টছ ৷ চাইছেনে ?

বাঁহেৰে নিৰ্মিত সামগ্ৰীৰ ১৯খন আলোক-চিত্ৰসহ তেওঁ দিয়া শেহতীয়া প’ষ্টটো DIBANG AN INCREDIBLE VALLEYত মই ইতিমধ্যে লক্ষ্য কৰিছিলোঁৱেই ৷ কথাংশত পঢ়িছিলোঁ…

Watch and enjoy local handmade bamboo products during Reh Festival in Anini. It will be available for sell during festival time. Go for eco and economic friendly products such as Tea Cup, Mug, Chopping Board, Key Chain, Jewellery Box, Travel Pack, Pen Box etc. made out of finest bamboo available in Dibang Valley, Anini. People interested for pre-booking order can contact in the given number below.
08794649168, 7005655502.
Like and follow the given page for more updates on upcoming new products. Bamboo Valley Creations.

বাঁহেৰে সাজি উলিওৱা কাপ, মগ আদি বিবিধ হস্ত-সামগ্ৰীৰ ফটোবোৰ কম্পিউটাৰৰ স্ক্ৰীণত আহল-বহলকৈ চাই আপ্লুত হৈ পৰিছিলোঁ৷ মিচিমি মানুহ বাঁহ-বেতৰ কামত ওস্তাদ ৷ হাত খুব ভাল ৷ উৎসৱথলীত এই সা্মগ্ৰীবোৰ প্ৰদৰ্শন কৰা হ’ব ৷ বিক্ৰীও হ’ব ৷ তেতিয়া চকুৰ আগত পাম, চাম, প্ৰয়োজন হ’লে ল’ম বুলি ভাবি থৈছোঁ ৷

উত্তৰত ক’লোঁ… বৰ সুন্দৰ সুন্দৰ সামগ্ৰী তৈয়াৰ কৰিছে দেই আপোনালোকৰ মানুহে ৷ স্কিল হ’লে মানিছোঁ ৷ মাৰ্কেটিঙত জোৰ দিয়ক ৷ এনেয়ে ৰাখি থ’লে নহ’ব ৷ (ক্ৰমশঃ)