আবেলিৰ ৰং

তিনি বজাৰ অলপ পিছতেই ঘৰৰ পৰা ওলালোঁ৷ লগত চতুৰ্থ শ্ৰেণীত পঢ়া মোৰ ছোৱালীজনী৷ পকেটত সৰু ডিজিটেল কেমেৰাটো৷ ম’বাইলৰ চুইচ অফ্‌৷ কাৰণ কোনেও মোক এতিয়া সামান্যতমো ডিষ্টাৰ্ব কৰাটো নিবিচাৰোঁ৷ কাৰণ মই এতিয়া মনে ভাল পোৱা কামত ওলাইছোঁ৷

আমাৰ উদ্দেশ্য, পদব্ৰজে ঘৰৰ পৰা পশ্চিমমুৱাকৈ অলপদূৰ গৈ, বাওঁহাতে দক্ষিণ দিশে ইৰিগেচন কল’নীলৈ সোমাই যোৱা পথটোৰে আগুৱাই সমীপৱৰ্তী ৰংকিমি, ৰংচিংবাৰ আদি অঞ্চলৰ বৰ্তমানৰ ৰূপ দৰ্শন কৰা৷ গৈ গৈ নিৰ্মীয়মান আছাম হিলছ মেডিকেল কলেজ এণ্ড ৰিচাৰ্চ ইনষ্টিটিউটখনৰ অন্তিম সীমাত উপস্থিত হোৱা আৰু অগ্ৰগতিৰ বুজ লোৱা৷ বাটৰ কাষতে এগ্ৰিকালচাৰ ক’লনীত ছোৱালীৰ সহপাঠী ৰংগীনা বৰগয়াৰীৰ ঘৰত ক্ষন্তেক জিৰণি লোৱা৷ উভতনি যাত্ৰাত থিয় পাহাৰ বগাই থাড’ ভেং হৈ খটখটিৰে নামি অহা৷ গোটেই চফৰটোকে এটা চাৰ্কুলাৰ ট্ৰেকিং বুলিব পাৰি৷

মাজে-সময়ে মই এনেকুৱা কাৰ্যসূচী লওঁ৷ চহৰৰ উপকণ্ঠৰ, আমাৰ চৌপাশৰ গাঁওকেইখন আৰু পৰিৱেশ ঘূৰি-পকি চাওঁ৷ খোজ কঢ়াত হেলা কৰা, চাৰিচকীয়া বা দুচকীয়া নহ’লে যাবলৈ ইচ্ছা নকৰাজনক পিছে লগত নলওঁ৷ তদুপৰি ভিতৰুৱা অঞ্চলৰ ওখ-চাপৰ পাহাৰত খলা-বমা পথেৰে ভ্ৰমি গ্ৰাম্য প্ৰকৃতি আৰু সমাজ-জীৱনক ওচৰৰ পৰা চোৱাৰ মোৰ হেঁপাহকণৰ বিৰুদ্ধাচৰণ কৰা কাকোৱেই গ্ৰহণ নকৰোঁ, তেহেলৈ অন্য প্ৰসংগত তেওঁ যিমান ঘনিষ্ঠই নহওক কিয়৷ এই ক্ষেত্ৰত মোক কোনোবাই নিৰ্দয় বা আন কিবা বুলিলেও কথা নাই৷ এইটো শুনিবলৈ বেয়া যদিও একেবাৰে সঁচা কথা৷

আজি মোৰ নিৰ্বাচনত উঠিল কেন্দ্ৰীয় বিদ্যালয়ৰ চতুৰ্থ শ্ৰেণীত পঢ়া মোৰে জী আনিচা৷ দুপৰীয়া প্ৰগ্ৰামটো বেকত কৰা মাত্ৰকে তাই প্ৰবল উৎসাহ দেখুৱালে৷ আগতীয়াকৈ সাজি-কাচি তপ্‌তিয়াৰ হৈ ৰ’ল৷ মাজে মাজে মোকহে যাত্ৰা সম্বন্ধে সোঁৱৰাই থাকিল৷ তাইৰ কৌতূহলী স্বভাৱটো মোৰ কিবা এটা ভাল লাগিল৷

বেলিটোলৈ মুখ কৰি আমি দুয়ো লাহে লাহে খোজ আগুৱালোঁ৷ চিন-অচিন অনেক চৰাইৰ কাকলিয়ে আমাক আদৰিলে৷ বসন্তৰ আগমনত গছ-বিৰিখে পৰিগ্ৰহ কৰিবলৈ আৰম্ভ কৰা নতুন ৰূপটোৱে সঁচাকৈয়ে মনটোত পুলক জগাই তুলিলে৷ অকাই-পকাই গৈ মনে ভবামতেই ঘূৰি-ফুৰি আন্ধাৰ হোৱাৰ আগে আগে ঘৰ সোমালোঁহি৷ ৰংগীনাৰ মাকে আথে-বেথে চাহে-মালপোৱাই আপ্যায়ন কৰোৱাৰ লগতে পূৰঠ কুঁহিয়াৰ এবোজাও নিজ হাতে কাটি দি পঠিয়ালে৷ সেইবোজা থৈ গাটো ধুই এইখিনি লিখি পেলালোঁ৷

ৰুবলৈ দিয়া কুঁহিয়াৰৰ আগটো পিছদিনা মাটিত ভালকৈ গুজি দিলোঁ৷ ন-পাতেৰে সেউজীয়া হৈ সেইটো আজি একঁকালেই হ’ল৷

জীৱনৰ আনন্দ এনেকৈয়ে লৈ থাকোঁ, অহৰহ৷

(ৰচনা : মাৰ্চ ২০১৪)