হস্তাক্ষৰ যেতিয়া চিৰস্মৰণীয় হৈ ৰয়...

অট’গ্ৰাফ সংগ্ৰহ যিকোনো বয়সৰ লোকৰ বাবেই এটা জনপ্ৰিয় হ’বি বা চখ বা ৰাপ৷ সমগ্ৰ বিশ্বতে এই কালেক্টিং হ’বি বা সংগ্ৰহ চখৰ জনপ্ৰিয়তা আৰু প্ৰভাৱ আছে৷ গ্ৰীক শব্দ অট’গ্ৰাফচৰ পৰাই অট’গ্ৰাফৰ উৎপত্তি৷ সৰল অৰ্থত অট’গ্ৰাফ মানে কোনো লোকৰ নিজৰ হাতৰ চহী৷ বিখ্যাত ব্যক্তিৰ সান্নিধ্য লাভ কৰি তেখেতসকলৰ স্বহস্তাক্ষৰ স্মৰণীয় কৰি ৰখাৰ হেঁপাহতে জন্ম অট’গ্ৰাফ সংগ্ৰহৰ৷

অট’গ্ৰাফ চাৰি প্ৰকাৰৰ৷ নিজৰ হাতে লিখা চহী, চিঠি বা কাগজৰ পৰা ফালি ৰখা চহী, মুদ্ৰাংকিত চিঠিৰ তলৰ চহী আৰু দলিল পত্ৰ আদিত কৰা চহী৷ প্ৰথমবিধেই সকলোতকৈ মূল্যৱান৷

সৰহভাগ লোকেই কেৱল চহী এটা কৰিয়েই নিজৰ অট’গ্ৰাফ দিয়ে যদিও কোনো কোনোৱে প্ৰেৰণাদায়ক বা আশীৰ্বাদসূচক বাক্য এশাৰী নাইবা দুশাৰী লিখি, নহ’লে ছবি এখন আঁকি অথবা গান নতুবা কবিতা এফাকি লিখি তাৰ সৈতে নিজৰ চহী কৰি দিয়াও দেখা যায়৷ 

হস্তাক্ষৰ বিশেষজ্ঞসকলৰ মতে এজন মানুহৰ হস্তাক্ষৰ বিশ্লেষণৰ জৰিয়তে মানুহজনৰ ব্যক্তিত্ব তথা মনৰ অৱস্থাৰ পৰিচয় পাব পাৰি৷ এনে হ’বিৰ পৰা নানা ধৰণৰ কথা শিকিবও পাৰি৷ কোনো লোকে সযত্নেৰে সংৰক্ষণ কৰা অট’গ্ৰাফসমূহ অদূৰ ভৱিষ্যতে অধ্যয়ন আৰু গৱেষণাৰ অমূল্য সম্পদৰূপে পৰিগণিত হ’বগৈ পাৰে৷

বিশিষ্ট ব্যক্তিৰ লগতে আত্মীয়-স্বজন, বন্ধু-বান্ধৱ, শুভাকাংক্ষী আৰু প্ৰিয়জনৰ হস্তাক্ষৰ সংগ্ৰহক নিজৰ ভাল লগা হ’বি হিচাপে গঢ়ি তুলিব পাৰি৷ লগতে আজৰি সময়ক আমোদ, আনন্দ আৰু আমেজেৰে ভৰাই তুলিব পাৰি৷