‘এতিয়া হয়তো আপোনাৰ মনত প্ৰশ্ন হৈছে, এল.আই.চি.ৰ এজেণ্ট হ’লেই বিদেশ ভ্ৰমণলৈ যাব পাৰেনে?...’

শনিবৰীয়া ‘মোৰ আলহী’ত আজি আগ বঢ়ালোঁ শ্ৰী সুপ্ৰিয় ৰয়ৰ চাক্ষুস বিৱৰণেৰে সমৃদ্ধ ‘মোৰ বিদেশ ভ্ৰমণৰ অভিজ্ঞতা : আমেৰিকা আৰু কানাডা’ৰ দ্বিতীয় অংশটি

............................................ 

হয়, এজেন্সিৰ এটা স্তৰ আছে৷ সেই স্তৰটো যেতিয়া আপুনি পাব, তেতিয়া আপোনাৰ আমেৰিকালৈ যোৱাৰ সুযোগ আহিব৷ সেই স্তৰটোৰ নাম হৈছে এম.ডি.আৰ.টি. (Million Dollar Round Table, The Premier Association of Financial Professionals) যাৰ ঠিকনা হ’ল 325 West Toughy Avenue, Park Ridge, Ellinois, USA৷ যেতিয়া এজন এজেণ্ট এম.ডি.আৰ.টি. হ’ব, ৫৫০ডলাৰ দি ৰেজিষ্ট্ৰেচন কৰিব লাগে৷ ৰেজিষ্ট্ৰেচন হ'লে এম.ডি.আৰ.টি. কাৰ্যালয়ৰ পৰা এজেণ্টজনৰ বাবে নিমন্ত্ৰণী-পত্ৰ প্ৰেৰণ কৰা হয়৷ সেই পত্ৰখনেই ভিছা পোৱাত গুৰুত্বপূৰ্ণ ভূমিকা লয়৷যোৱা ৩১অক্টোবৰ ২০১৪ত মোৰ এজেন্সি কৰা ২৭টা বছৰ পূৰ্ণ হ’ল৷ যোৱা ১৫বছৰ ধৰি মই ভাৰতৰ বিভিন্ন নগৰে-চহৰে অনুষ্ঠিত কনফাৰেন্সসমূহত উপস্থিত থকাৰ বাদেও বক্তব্য আগ বঢ়োৱাৰো সুযোগ পাইছোঁ৷ সেই মুহূৰ্তবোৰত এটা কথাই মোক খুব আনন্দ দিয়ে যেতিয়া মোৰ মনলৈ আহে যে মই কাৰবি আংলঙক প্ৰতিনিধিত্ব কৰিছোঁ৷ কাৰণ কাৰবি আংলং কেৱল মোৰেই জন্মভূমি নহয়, মোৰ দেউতা স্বৰ্গীয় সুবোধ কুমাৰ ৰয়ৰো জন্মভূমি৷ভাৰতৰ বিভিন্ন ঠাইলৈ যাওঁতে উচ্চ পৰ্যায়ৰ বিভিন্নজন এজেণ্ট, বিষয়া, মটিভেটৰ লগ পাইছিলোঁ৷ তেওঁলোকৰ প্ৰেৰণামূলক কথাবিলাকৰ সৈতে বিদেশলৈ যোৱাৰ অভিজ্ঞতাৰ বিষয়ে যেতিয়া শুনা পাওঁ তেতিয়া মোৰো বিদেশলৈ যোৱাৰ আকাংক্ষা প্ৰৱল হৈ উঠে৷ এইখিনিতে কওঁ, ‘প্ৰৱল’ শব্দটো ব্যৱহাৰ কৰাৰ এটা কাৰণ আছে৷ সৰু অৱস্থাৰ পৰা আগুৱাই যেতিয়া অলপ বুজা হৈছিলোঁ, বিদেশ, মানে ফৰেইনৰ কথা ওলালে বাকী চব কথা বাদ দি সেই বিষয়তে সোমাই পৰোঁ৷ ফৰেইনৰ প্ৰতি অনুৰক্ত মই সৰুৰে পৰাই আছিলোঁ৷ অৱশেষত ২০০৯চনত মোৰ জীৱনলৈ প্ৰথম বিদেশ ভ্ৰমণৰ সুযোগটো আহিল৷ মই এম.ডি.আৰ.টি. চৰ্তাৱলী সম্পূৰ্ণ কৰি পেলালোঁ আৰু ৰেজিষ্ট্ৰেচনো কৰিলোঁ৷ আমেৰিকাৰ Indianapolisত অনুষ্ঠিত এম.ডি.আৰ.টি. কনফাৰেন্সত ভাগ ল’বৰ বাবে মোলৈ নিমন্ত্ৰণী পত্ৰ আহিল৷ কিন্তু তথ্যপাতি সম্পৰ্কীয় বহুতো কাম সম্পূৰ্ণ হোৱাৰ পিছতো বহু আকাংক্ষিত মোৰ সেই ভ্ৰমণ সম্ভৱ হৈ নুঠিল৷ মই যাব নোৱাৰিলোঁ৷ হ’লেও কিন্তু অকণো বিচলিত নহ’লোঁ৷ বৰঞ্চ আগতকৈ অধিক উদ্যমেৰে, আমেৰিকালৈ যোৱাৰ লক্ষ্য সন্মুখত ৰাখি কাম কৰি গ’লোঁ৷

(পিছৰ অংশ অহা শনিবাৰলৈ)