ব’হাগ মাহৰ মহিমা বৰ্ণনা 

(সংগ্ৰহ)

ব’হাগ মাথোঁ এটি ঋতু নহয়,

নহয় ব’হাগ এটি মাহ,

অসমীয়া জাতিৰ ই আয়ুস ৰেখা

গণজীৱনৰ ই সাহ৷

    ব’হাগ মাথোঁ বিহুতলী নহয়

    নহয় ই নিশা ফুলা ফুল,

    ব’হাগেই আনি দিয়ে সমদল গতি

    নেওচি জাতি কুল,

    ই প্ৰভেদক কৰেহি নাশ৷৷

ব’হাগ এটি মাথোঁ মাকো নহয়

নহয় ই কুলিৰে মাত,

ব’হাগ এটি নৱ নৱ চিন্তাৰ

সাঁচিপাত পুথিৰে পাত,

ই উজলায় জীৱন-আকাশ৷৷

    ব’হাগ মাথোঁ বিহুগীত নহয়,

    ইনাই-বিনাই গোৱা

    ব’হাগ এখনি সৃষ্টি দলিল

    সূৰ্যৰ জ্যোতিত পোৱা

    ব’হাগেই এন্ধাৰৰ ত্ৰাস৷৷

ব’হাগত জাতিয়ে স্নান কৰে

মলিয়ন বস্ত্ৰ সলায়,

সংগ্ৰামী জীৱনতো

ৰণ প্ৰেৰণা

দিয়ে বৰদৈচিলাই,

ওফৰায় দুখ নাগ পাশ৷৷

ডক্টৰ ভূপেন হাজৰিকা

‘গীতাৱলী’